الليل ماله للسهر شرع واحدود
سريت كني في دياجيه هايب
واقفرت ظيم برحلة التيه معقود
كني طريد السافيه والهبايب
ونزلت في دارٍ كسا ربعها الجود
وارخت ذوايبها عليها السحايب
فاضت فيافيها مواريد واعدود
عقب المحول المرملات النوايب
وقفت ساعة غادر الحي مفرود
والحزن دون مصافح الود غايب
ارقب منازل كانو اصحابها اشهود
أهل الندى عند الجدى والصعايب
راحو ولازالت مناهلهم أعدود
يدرك صبي القوم فيها لشايب
الي لهم شيمه على كل محمود
مايحقرون الي با الاجواد طايب
واليوم بدل وقتنا بيضنا سود
وشبت على روس الرجال الشبايب
سقاك ياوقتٍ مضى فيض مرعود
جود الثعول الهاطلات الصبايب
من عاش بالدنيا بالاسباب موعود
وعشنا بهالدنيا وشفنا العجايب
خذها نصيحه تدرك العلم ياسعود
وأنت الذي في رحلة العمر جايب
احفظ قدر نفسك لياصرت مرشود
وعِين الذي صكت عليه النكايب
جنب خطا رجلك عنا كل منقود
وارقى على روس السنود الرقايب
خلك حليم ووافر العلم وتقود
فالكايدات المرهبات الحرايب
وإعلم ترى فالناس جاهل ومقرود
فلا يشغلك عن غايتك كل خايب
من لايقدر لحيتك وانت موجود
ماهو مكرم شاربك وانت غايب