سهل تجرح
حد ما تخليش لخطو الجرح مطرح
سهل تجرح
بس صعب إنك تداوي أو تفرّح
الحروف زي السهام
لما تخرج مش بترجع
بس بتصيب أو بتوجع
مهما حطيت من مراهم الاعتذار فوق الندوب
أبداً ما تشفع
الكلام زي البشر
في أمان أو في خطر
في اللي آمن أو كفر
في اللي انكسر واللي انتصر
واللي شكر واللي صبر
واللي عدّى ف جدب أيامك مطر
في اللي خلّى الحلو مُر
بعضه خير أو بعضه شر
الكلام زي البشر
في اللي بيطيّب وطيب
والغريب والقريب
في الحبيب والطبيب
في اللي هان واللي خان
في اللي خاف واللي شاف
في الكفيف
والعفيف
واللي رأيه حد سيف
في اللي زيف
واللي مر ف حر أيامك كنسمة جت وبلت صبر صيف
الحروف زي البشر والقلوب زي البيوت الساكنة فيها
في اللي هادمها وبانيها
واللي بايعها وشاريها
واللي ساكن عمره فيها
واللي زارها أو عليها
مَر ضيف..