ودعتك الله يافريد التواصيف
يالنادر اللي مال مثلك وصايف
هول الفجيعه نشف الدم تنشيف
وهز الشعور اللي بوسط النحايف
لكن قضاء المعبود واِل التصاريف
لاحان أجل الموت ماهو ب طايف
إبحتسب وصبر وربي بي إلطيف
لو أن دمعي فوق خدي ذرايف
انشهد أن العمر من دونك إكليف
لو الثقايل فوق متني خفايف
أشوفك الآمعط وشيّب المهاريف
اللي تقانب فوق رجم النوايف
وشوفك الضرغام بدرب الصواديف
تقلط على الهيه ظفر منت خايف
وشوفك الهقوه وسيف الشواحيف
اللي مع دروب المراجل ولايف
وشوفك النخوه بوجه المعاريف
لاجاك من يشكي عليك الكلايف
وشوفك بوجه الكرم بهجة الضيف
جزلً كريمً ماتحب الضعايف
وشوفك الشامخ برؤس المشاريف
عن ساقط الهرجه عشيق الذعايف
وشوفك الحكمه لتوع المزاهيف
لطلق لسانه كل ساذج وزايف
وشوفك المنطق وزين السواليف
لاجا لمنطوق العوارف طرايف
وشوفك لصدري نسيم الهفاهيف
اللي اتداوي روح نبض الشغايف
وشوفك سياجي بوجه العواصيف
لاهبت رياح السنين الصلايف
مهما كتبت من البيوت المحاريف
أشوفك أكبر من وصوف الوصايف
لكن عسى غر المزون المراديف
تروي ثرى قبرً لروحك لحايف..