بينه وبين النغم مايشبه الاندماج
متوحدين فبعض مثل السحب والمطر
في وقفته يعتدل في الفن كل اعوجاج
ومن صوته تسيل موسيقى ويعزف وتر
رفيق ليل السهارى واعتدال المزاج
عطر المواعيد واجمل مايبوح السهر
كم مال من وقفته غصن يحب الغناج
وكم سوسن الليل واهدى للعذارى قمر
كأن في " آهته " لاهل ال محبه علاج
وكأن " صوته " وطن للمتعب من السفر
يهديك في ليلك الحالك شموع وسراج
ياخذ من اقصاك لحظات الألم والكدر
من نبرة غناه يتموسق أمل وابتهاج
تحس روحك معه فوق السحايب تمر
ان اطرب اهل البحر غنى البحر له وماج
وان اطرب البر ترقص له غصون الشجر
نجم اعتلى كن مابينه وغيره سياج
كم صوت دونه تهاوى، كم محاكي قصر
ستين في الفن، كنه لبَّس الفن تاج
ستين في الفن ماكانت مجرد عمر!
اوضح من النور واصفى من بريق الزجاج
تمرحلت واكتمل فيها الوهج للنظر
تكونت كيف؟ مدري .. بس كانت نتاج
الموهبة، والذكا، والتضحية، والصبر
ستين كانت له وللفن باب انفراج
وكانت لعشاق روح الفن حلم ومفر
صوته تعدى الحدود اللي تحده وراج
واستاهل يكون " فنان العرب " من دهر
بينه وبين الموسيقى انتما وامتزاج
من فيهم يغني الثاني ويعزف وتر؟!