أنا مرات أحس أني أبي عزلة عن التفكير
أبي عزلة عن الواقع... بحلو ومرّ أقداره
يظنّ الآدمي نفسه مع الأيام صار كبير
وهو ما كبّره غير المواجَه طول مشواره
يعيش ويعرف أنّ الحال لا بدّه من التغيير
وأنّ القلب متقلّب... وهذي الدنيا دوّارة
هذاك اللي قريبْ لقلبك ودايم وجوده غير
يجي يوم ويصير أبعد من الميّت عن دياره
إذا صادفت في الدنيا من لغيره يحبّ الخير
تغانم عشرته واحفظ له حضوره ومقداره
ترا راعي الوفا مرة يجي غصنك كأنّه طير
وإذا ضيّعته؟ بيلقى من يرحّب ليا زاره
عزيز النفس يستغني إذا ما حصّل التقدير
لو أنْ قدرك عليه أغلى من عياله ومن داره
يا كم واحد يصير أقسى ويدمّر داخله تدمير
ولا يمسك مكانٍ ما حشم قربه ومقداره