شعب ووطن وحكومه وعرب واسلام
كل واحدٍ الله يمسيه بالخير
في محفلٍ عالي مقامه وهو هام
محفل وطن ماهوب محفل مخاسير
يوم الوطن ماهو مثل كل الايام
له منزله عليا وله شانٍ كبير
يوم الوطن ماهو حسابات وارقام
عمر الشعب عمره من كبير وصغير
فيه نتباها ونفتخر بين الانام
واليا ضما دمائنا كنها بير
نقدم ليا احتاج الوطن مننا اقدام
بارواحنا واموالنا بدون تأخير
للمملكه باجسادنا درع وحزام
الدار دونه ماتفيد المعاذير
نصير في حد الوطن مثل الالغام
ونفجر اللي يعتدي فيه تفجير
حقيقة ماهي خرافات واوهام
نفخر به وله نحضر بدون تقصير
حنا وطنا قبله لكل الاسلام
حنا وطنا غير وحكومته غير
يرفع علمنا يوم تنكيس الاعلام
ويزبن المضيوم ويعدل السير
في حكم اخو نوره ليا قال قدام
قدام كل الشعب في حكمه يسير
سلمان سلمان العرب شرقٍ وشام
يامر على العالم وماقاله يصير
ونجله ولي العهد للضد لطام
محمد بس اسمه يهز الطوابير
ضرغام ومعنز على راس ضرغام
مايشبه الا اجبال ابانات والنير
فيه من اخو نوره معزي ليا قام
عبدالعزيز اللي سيوفه بواتير
حكيم راي وصلف يمنا ومقدام
ويسخر العالم على رضاه تسخير
تحققت في عهدهم كل الاحلام
ويدبرون امورنا خير تدبير
حب الوطن بصدورنا نعلقه وسام
ماهو كلام نعلقه بالمسامير