وآديك يا قلبي.. فاضي
وغاوي تعيش قواضي
لكين فين القضيّه
وفين هُمّا الأعادي
عملنا محكمه فورًا
لكين فجأه
أعلن الحاجب
وهوه رافع الحاجب:
قاضي المحبه اختفى
وانفضّت الجلسه
ما احنا الدلع صايم
واحنا الوجع قادم
واحنا الفرَح دايم
وفْ لحظه فوضويّه
نتنسِّم الحريّه
تتبسِّم الحريّه
ما احنا بالتأكيد
مش ناس هفيّه
ولا قلب فيه تنهيد
ولا راس مطاطيّه
عملنا محكمه فورًا
لكين فجأه
أعلن الحاجب
وهوّه رافع الحاجب:
قاضي المحبّه اختفى
وانفضّت الجلسه
وآديك يا قلبي فاضي
وغاوي تعيش قواضي