تلاتين سنة.. مخدوع انا
موجوع ولا دقت الهنا
حِمل السنين زاد الانين
والصبر مرّر حلونا
تلاتين سنة بيساووا كام
من عمرنا.. يا صبرنا
تلاتين سنة، وبقول قدر
يمكن يشق الليل قمر
مشوارطويل والخطوة ميل
والصبر من صبري انتحر
تلاتين سنة من غير هنا
بيساووا كام من عمرنا؟
تلاتين سنة وخلص الكلام
لا عتاب ولا ينفع ملام
مين اللي باع؟ ايه اللي ضاع؟
حبة سنين بيساووا كام؟
تلاتين سنة من عمرنا
بيساووا كام تلاتين سنة؟
يا سنين ومزروعة جراح
يا حلم اصبح مستباح
لا عتاب يرجع عمرنا
ولا لوم يعوضنا اللي راح
تلاتين سنة من عمرنا
ضاعوا هدر يا حظنا