المنظر اللي يفتح عيون الشعور
ريح الثرى والأرض كاسيها ربيع
مشهد يخلي العقل في حالة حضور
من بعد ما كان لهواجيسه منيع
من مدةٍ وأنا من الدنيا ضجور
دنيا تضيقها ولو صدري وسيع
لا مرت الضيقة تجالسني شهور
وان مرت الفرحة تعداني سريع
واحدٍ حياته بين بستان وزهور
واحدٍ حياته كنها موسم صقيع
وأحلامنا تكبر ولا جاها فتور
لو انها للناس لا يمكن تشيع
في مملكة فكري مشيد لي قصور
وفي واقع أيامي من الكرسي خليع
وبالتسميات اللي جرت على العصور
حقٍ نسمي عصرنا العصر الوضيع
دام الذباب بوقتنا قاد الصقور
والصقر من خوفه عن المرقب جزيع
وحتى المهبل قامت تسوق الغرور
وصارت على العالم بضاعتها تبيع
وعلى المبادي قامت تزود الشرور
مدري وش اللي زحزح السد المنيع
انشهد أن الوقت ما يثبت يدور
وانشهد أن الوقت بالميله شنيع