يالله يالمعبود يا رب الأرباب
يالواحد الخالق عزيز الجلالي
اللي رجاك ويطلب رضاك ما خاب
ويوم الحشر ما غير ضلك ظلالي
يسمع دعا خلقه وليمن دعي جاب
ونصر نبيّه في نهار القتالي
في بدر والخندق ومؤته والأحزاب
ما بقي لأهل الكفر عزّ أو مجالي
يا مرسل محمد إلى الخلق بكتاب
أنك تنجينا بيوم السوالي
يومٍ تضيع به الهقاوي والأنساب
وكل البشر حضّارٍ أول وتالي
في ماقفٍ ما للبشر منه مهراب
من شدته هيلت كبار الجبالي
ولا تنفع التوبة بوقته لمن تاب
إلا العمل عبر السنين الخوالي
يومٍ عبوسٍ ما لنا عنه مجناب
والريق وسط الحلق ما له بلالي
الرجل ينسى أبوه وامه والأقراب
ويقول وين ألقى نجاتي لحالي
من قوة الأهوال الأطفال شياب
والكل جاله بالمصير انشغالي
المؤمن الصادق يقابل بترحاب
ويدخل جنانٍ تربها مسك غالي
ويسكن قصور وبالحرير البس ثياب
ويدخل نعيمٍ مالوصفه مثالي
والكافر الفاجر يقيّد بالأعقاب
ويرمى بنارٍ في لظاها اشتعالي
وإذا نضج جلده يبدل والأعصاب
ولا ينفعه لو يفتدي بالعيالي
يا ويل من طبعه منافق وكذاب
طاع الهوى والنفس وأهل الظلالي
ويا ويل نقّال النميمة ومغتاب
يوم الحساب وكشف ستر الخمالي
دنيا العنا هذي تقلب تقلاب
هاضت هجوسي الراس مما طرالي
والوقت هذا وقت خاين ونهاب
تغيرت حتى فعول الرجالي
لأذناب صارت روس والروس الأذناب
والناس ما تفرق حرام وحلالي
ما عاد يفرق صقرٍ وبوم وغراب
كلش طيور تحوم روس العوالي
لها مناقيرٍ وريشٍ ومخلاب
والفرق بيّن في نهار الفعالي
واحد إذا جاء الجد للصيد جلاب
وواحد على الجيفة يحط الرحالي
والناس مثل الأرض وديان وهضاب
وناسٍ ذياب وناس مثل الرخالي
والبعض كلمه زايده ما لها إعراب
مثل الهباب يطير عند النخالي
نصيحتي يا من يدور للأصحاب
احرص على صحبة كرام السبالي
ترى الوفي للضيق ماهو بهيّاب
ولاهو من اللى يحسبون الريالي
ولاّ الردي في ساعة الضيق ينساب
ما هو من أصحاب اليدين الطوالي
واحذر من اللى للسواليف حطاب
ما يعرف ايش الهينة والجزالي
تلقاه للحوم الرجاجيل قصاب
وعند الحقيقة ما يساوي نعالي
حرب القريب مطيع للناس الأجناب
يصبر على الزلات صبر الجمالي
ولا تأمن الحية ولا تأمن الداب
أذهن لخطو الرجل فوق الرمالي
وتمت وصلى الله على سيد الأعراب
محمد المختار عدّ الخيالي