لا تنطفي لهفة النار ويموت الفَراش
مافي يدين الظلام إلا مشاريه .. نور
لو غارت البير وانقصّت حلوق العطاش
رجعت نص الطريق وصرخة الفُقد: سور
ف المنتصف في سكوتي ما يثير النقاش
في دمعتي ضحكةٍ خجلى وللحزن دور
ربطت حلم اتجاهي في طواريك جاش
قل انقطع بك ضماي وجيت صحراء وبور
لحظه ينام السهر فيك ويطير الغباش
مهما نكابر.. رحاة الذاكره لا تدور
خذ قدر ما تشتهي واهديك حلمي بلاش
وانا على هامش المسرح غيابي: حضور
نادتني الشمس واغتاضت طيور العشاش
كيف اقتربنا مسافه وابتعدنا شعور..