يوم ما فت وقلت رايح

يوم ما فُت وقلت رايح..

فُتِّني ورسمك مليني

ف قلبي.. فكري.. وجوه عيني

عايشه بيك.. وأنت لسه جوه مني

لسه عايش في الجوارح

هو ايه نابني ف بعادك

غير مطال الليل وأنا

أسمع النبضات وهي

دقة دقة.. شكوى تستغرب غيابك

دقة دقة.. تكتب الشعر اللي جمرُه من عذابك

سابك الحلم لطريقك

ولا سيبتُه انت لحنينُه.. ولظنون ليله ف عتابك؟.

هو ذنبك ولا ذنبي

لما يومها قلبي سابك؟

يوم ما فُت وقلت رايح..

قلبي حس بشيء حيحصل

قالي

وانا دورت وشي

لا لا يمكن

يستحيل تِندار عيونه

ولا تِغمَض يوم جفونه

لو يشده الكون لا يمكن

قلبي مستني السفاين

قلبي مستني الرسايل

لو يشده الكون لا يمكن

مش حاصدق انُه خااااين