قالو حبيبك راح ماهو بكيفه
وانت اتركه مالك بشون المخاليق
وقلبي كفخ بين الضلوع النحيفه
كفخة نداويٍ تتله مسابيق
ومع كفخة الخافق دموعي ذريفه
تمزعن منها بقايا المعاليق
في لحظةٍ همي بها سل سيفه
حسيت كنه طبق الكون تطبيق
وحالي بدت فيها الامور المخيفه
تذرف دموع الي شكا الهم والضيق
باعيش بعده بالحياة الكسيفه
وحدي مادامت عيشتي ضيق في ضيق
اول ربوع القلب كانت امريفه
واليوم راحن زاهيات المواريق
حت الامل منها الزمان وخريفه
واحكام ناسٍ بين كذبٍ وتلفيق
باقي من الذكرى العلوم الطريفه
تسوق نفسي للأمل غصب وآفيق
اصحي وجرحي ماتوقف نزيفه
واجلس مع آلامي ودمعي مدافيق
نفسي على ماصار بعده عسيفه
عسفت نفسي عن كلام المخاليق
لوكانت الوحده عليه كليفه
كرامتي تبقا بروس الشواهيق
ولاصير مغزى للنفوس الضعيفه
مابين تحليلٍ ومابين تعليق