لك وَحشةٍ أكبر من حدود الأيام
هزّت معاليق الخفوق وعصتني
اشتقت لك عد الليالي والأعوام
ذكراك من بين الخلايق خذتني
ما كنت عارف للوله سيف ولجام
ليما رياح الشوق حيل امطرتني
استوحشت في غيبتك دار الأكرام
لو كثرت العربان ما عوضتني
لك منزلٍ بين الحنايا والعظام
فيه المشاعر هاجرت واسكنتني
أُمي نبت في داخلي عشق وأحلام
يا كم مرة بالمودة سقتني
أمي تنام العين والشوق ما نام
حتى حلوم الليل صوبك رمتني
ترحيبتك تنبت نواوير وخزام
لو جيتها محزون كم فرحتني
بشاشتك كنها مخاييل ورهام
من مزنها الهتّان ياما روتني
طيبتك وإحسانك على صدرك وسام
أستشهد الأحباب واستشهدتني
لو جيت أبا أكتبك بستنزف أقلام
أخلاقك الحسنى تراها اكتبتني
في غرفتك أوقف على الباب بإلزام
أرقب طيوف بالمحبة اغمرتني
جدران بيتك تشتهي قرع الأقدام
بشوقها المكبوت كم صارحتني
سجادتك تعزف أحاسيس وأنغام
وقت الصلاة بهمها خبرتني
أدراج دولابك من البعد تنضام
عن شوقها ليديك كم صاصرتني
وأغراضك إللي شككلت كل الأحجام
آجي ألملمها وهي لملمتني
لاحد يلوّمني فوالله ما أنلام
هذي ترا أمي وهيه اصنعتني
أبذل لها روحي ودمي والأنسام
كونت حبي لجلها وكونتني