قالت ما نقولكش وصف زيني
انا يا حنيني عليك نخاف
يقدك وايلا تقدر توصف عيني
غير عيوني وعليك بزاف
قلت نشوف ونحيد لخوف
هما غير عيون والموت تهون
لقيت ليل ونجوم وسكون
ولغة وكلام ماشي معروف
حاولت نفسر لكلام كلمة كلمة
اللون يقولي ماشفتي فحالي عينين
ولشفار تقول لي اختار لحكمة
وباش تشوف بحالي على فين وفين
لي خلقني موصوف بالرحمة
وانا مانرحم عاشق وخا مرضي الوالدين
عيون ما عرفت هواها من ماها
حرت نوصفها وفيها سر مكتوم
فيها نظرة تبوح بغرامها وبهواها
وتشكي حال لي هو محروم
خدات من لغزال والضبي والمها
فيها سحر فتان وخمر مختوم