وقدرت أكون ضحية
ألى روح: خالد سعيد
بدل مالبس قضية متلفقة
ويطلعولى بانجو ومطاوى
دسولى المخدرات لما منعت الرشاوى
ونزلت عليا زلازلهم وحتما تقوم قيامتى
لاعرفت أقيم ضهرى ولا أرفع هامتى
بان لما فهموا غلط أبتسامتى
وقوام كانوا محضرين ورقتى
وحاصرونى لحد م أسودت دنيتى
وعارف إن م حدش هيقدر يدفع ديتى
دنا مصرى اسكندرانى.. وإيه كونيتى
صحيح ماليش ضهر يسند جثتى
ولاحد يستر عجزى مع يأسى
فى لحظة دفاعى عن نفسى
أدينى أترميت فى إيديهم ومقدرتش
أشوف بعينى النور من برق غدرهم
ولو عرفوا قد إيه وجعنى ضربهم
كانوا أفتكروا الرحمه اللى خلقها ربهم
ونسيوا إن هما مجرد مخبرين
وناس شبهنا مقهورين
صحيح المخبرين مجبرين
بس ماهماش مجبرين..
ياكلوا بالسحت والشحاته والسلبطة
ويسرحوا ع الخلق للى يدفع لهم بلا لخبطة
مايبقوش بنى آدمين.. دى شياطين متنططة
كبيرهم بيشجعهم
مع إنهم لو راحوا مش هايرجعهم
كان نفسى ألاقى الحق اللى يوجعهم
ونا الضحية اللى لعنتهم ونا بودعهم
مين بعدى؟؟ يخلهم خلع وينزعهم
النظام مش هيبقى نظام لما يرفعهم
وأحنا مش هنبقى من غير مانمنعهم
ماتنطق!! أنت معايا؟؟ ولا معهم