يا عبرةٍ حرّى تِثنّى على الخد
الصدر ضاق وتالي الصوت عبرات
أشباح حزني في سما خاطري تْرد
وتجدد جروحي على كل ما فات
أجاهد الضيقة وأعوّد على السّد
وتخنقني العبرة ب غفلة ولحظات
يا قسوة الأيام ل أقفتْ ب من وَد
ما عاد باقي غير ذكرى وونات
مروا عليّ وطيفهم كنه الورد
ينبت بوسط الروح رغْم المسافات
أقفت بهم سود الليالي على بُعد
صاروا سراب وداخل الجوف أموات
أجرّ صوتي في دجى الليل وأعِد
أيام أقفت والمواجع مقيمات
أومي ب كفّي ل السحاب وتِبدد
كنّه يوصّيني على الصبر ب سْكات
ألوذ في صمتي عسى الضيق يرتد
وتسري بي أفكاري وللموت سكرات
أسامر نجوم السما والمدى مَد
وأقول يا كبر الفضا والمعاناة
راحتْ بْهم الأقدار عنّي على حد
ولا بقا إلا طيفهم داخل الذات
ويا صدر يا اللي صرت لأمواتي المهد
أرفق ب غالي نبضة القلب يقتات
ويا عبرةٍ حرّى تِثنّى على الخد
الصدر ضاق وتالي الصوت عبرات