رسمتى بإيدك طريق النهاية
بريشة قساوتك ف صفحة هوايا
محيتى نهارى بشكك وعندك
وجيتى ف منامى نهيتى الحكاية
وكم ألف دمعة ف بحرك رسمتى
خطوطها بتعلى تغرق سفينتى
وموجه غريبه تكسر ضلوعى
نيابها الجوارح بتجرح كرامتى
وميت ألف صخرة رميتى فى طريقى
عشان لما ارجع تقطع عروقى
وفوق شط هجرك رميتى ودادى
بقسوة رفضتى غرامى وشوقى
وف مساحة سودة دفنتى فؤادى
وفوقها كتبتى دا كان يوم عشيقى
يا حلم الليالى لقيتك سراب
بتسرق ف عمرى ليالى الشباب
نجومك بتهلك قلوب الحيارى
وشمسك بتحدف عليا العذاب
ف قلبى رسمتك غرام للنهاية
وليه استبحتى دموعى ودمايا
أحاول أغير خطوط الحقيقة
بكف القساوة كسرت الدواية
أعاند وأحلم أغير طريقك
تجينى ف منامى وتنهى الحكاية