ياذيب يلي تالي الليل جريت
صوتك على راس الزبير السويا
حالي مثل حالك واجر التناهيت
ويغني اهاتي طيور العليا
انته تجر الصوت اذا ماتعشيت
والا وجع ضرسك ليامن تهيا
وانا تنهاتي وحزني لما ريت
من الوجع والضيم وسط المحيا
ماهمني زادي ولو ماتغديت
صايم بشهر الصوم والا بليا
قلبي ترعرع بالشقى ثم تربيت
على المراجل في الزمان العتيا
اكتم همومي للملا ماتشاكيت
ومحدن سوى ربي يعلم الخفيا
ياذيب انا للدانيه ماتوطيت
وفي خوتي مالد صوب الرديا
ياذيب انا بسمي وفعلي تعليت
ماهمني حكي العواذل عليا
ماحركو في شعره دامي لي صيت
واكبرهم الي ذا مقامه هنيا
من حكيهم ياذيب انا خافقي ميت
لانه مع الذربين عاش وتفيا
وفي خوة الوافين انا ماتهنيت
خوة سنه ثم قال للصد هيا
ياكثر ماشفت بحياتي وخاويت
لاكن حسافه وين نلقى خويا؟
اذا دعيته قال لبيك حييت
ولاغبت ياتيني وانا ماتريا
واعلمه واقول في عيني تبيت
ياعود مسكٍ بالغصون النديا
ياذيب لو انك فهمت وتحاكيت
افهمك ليه التناهيت تيا؟
لو تعرف الي خافيٍ ماتعليت
فوق الرجم تعوي بصوتٍ نديا
هانت على هونك ولا تنفع الليت
لو العوى يوصل حدود الثريا
ياذيب دام الليل هم وتناهيت
اضحك مادام الحظ عاند وعيا