رزق العباد مقسمه ربي اقسام
يامعاتب خطانا بقلّ المماشي
ماهو مكانن يمّه نحث الاقدام
ولا طريق — ونعبره بنبراشي
بس اذكر الله واحمده واشكره دام
كتب لك التوظيف في عمر ناشي
لاتحاسب العاطل على نومة ايام
والله لو انه فوق راسك فراشي
حسدتنا حتى على اضغاث الاحلام
اللي من ابليس اللعين المواشي
ترى عطالتنا بعد خمسة اعوام
غربة__وفيها العلم كنّا نماشي
جبنا الشهاده خله يلوم من لام
من فضل ربي ماتعبنا بلاشي
عكس اشرعتنا كم جرت ريح الايام
ويردّها عزمً على الموج طاشي!!
واليوم انا ابشرك .. برنامج انعام
يصرف لي مرتّب مربّي مواشي
ثلاث ميه // ملزمه يمّي الزام
اليا نزلت لي صرت رجّال كاشي
امورنا .. واوضاعنا .. في شكل عام
زينه _وضيف الفقر لو زار ماشي
وعمر البنادم لو هو يطول مادام
نهايته حفره وقطعة قمآشي ()