وإيه باقي
شوية دمع لفراقي؟؟
وحبة حبر في جريدة
تقول مات الولا حميدة؟
وإيه يعني؟؟
وأمي هتبكي ليل ونهار؟
وقلب حبيبتي هيقيد نار؟
وإيه يعني؟
مادام لسه بلادي عمار
عمار علي مين؟
على ولادها؟
ما اني منهم
وعمري ما شوفت منَّها خير
غير إني بعيش على أرضي وطافح دم
بنام وأصحى على جحودها
وشيل الهم
ولو همي طفح أنهار
وجيت صارخ وقال جاي
يقولك؛ بس يا وليدي دي مصر دي أم
فلازم تشقى وتعافر
وتتحمل قانون كافر
وترمي شقاك في حضن أمك
وتاخد هي من دمك
عشان تدي ولاد عمك
ولاد صهيون
ولازم أعيش واني ساكت
مفيش صحة ولا تعليم وحتى قانون؟
وإيه يعني؟
ما دمت في بلدي كله يهون
وإذا مليت؛
هلملم هدمتي وكفني واسيب البيت
ما أني أصلا منيش باقي
هسيبك وامشي يا بلدهم ومش بلدي
هسيب فيكي حنين أمي وشوق ولدي
ويا عالم هشوفهم أمتى ولا إزاى؟
ويا خوفي عليك يا ابني من اللي جاي
هتكبر كيف؟؟
ومين هيشيل في يوم عنك؟
ده لا جدك عقيد شرطة
ولا خالك عميد في الجيش
وتكبر ليش؟
عشان تبقى عريس لسعاد؟
وفين المهر والصيغة؟
ما اني لا تركت لك عزبة ولا أراضي
وكل شقايا راح يا وليدي ع الفاضي
هقولك يا أبني حكمة أب
كان عايش وكان راضي
بلاش تدي لبلدك حب ع الفاضي
دي لكانت في يوم أمك
ولا شالت معاك همك
ولا مرة جبتلك حق
ويوم ما احتجت ضمتها
لقيت زنزانة كيف القبر بتضمك
ومصر أهي واقفة تتفرج
على قاضي سرق عمرك
دي مش أمك
ولما سألت فين العدل؟
فين الحق؟
قالولك؛ لا
مفيش باقي