بنات إبتكار أفكار فكري تجيك أبكار
رفيعت مقام وعذبتن غيد جذابه
بديت القصيد بذكر رب الملاء الجبار
ولا خاب من ذكر الله الحق يبدابه
عليه أتكلنا هو عليم أبخفى الأسرار
عليم ابخفى الإنسان في داخل البابه
عن أمره أبكاف ونون شئون الحياة يدار
ويعلم أسرار الكون واللي تخفابه
رجائي وملاذي، خالقي ربي الغفار
وحبيبي نبين مرسله يحمل، كتابه
ومن بعد ذكره وين أحصل لي أستفسار
عن ألطيب اللي في السفر طول غيابه
عن الطيب الغايب عساها تجي الأخبار
خبرها يسر قلوبنا وانت سلابه
وتفرج عن اللي ضايق خلقه ومحتار
ويسعد بها اللي متعب همه، أعصابه
له شهور لآ جاء الليل بركان همه ثار
تقول ان خفوقه صالي النار يصلابه
تهب الطواري في خفوقه مثل الإعصار
ولا حصل اللي من صلفها، يتذرابه
عليه الطواري كل ساعه تجي زوار
تسير عليه وكنها من حدى أقرابه
من اربع جهات الكون سوت عليه أحصار
وجميع المنافذ كلا منفذ أبوابه
لكن القصيد اللى نخيته فزع ما بار
وبيتن يقصر لازهم بقطع أطنابه
أن كان النوادر ما تجي مثل الأمهار
اللى أحتجتها والا الشعر ويش يبغابه
مادام الفرايد في الضمير لها مضمار
بجرد حسام الموهبة واقضب أنصابه
لا من أنتضئته من جفيره علي تندار
لعوب الخيال اللي للفكار لعابه
بنات أبتكار أفكار فكري: تجيك أبكار
رفيعت مقام وعذبتن غيد جذابه
لها هيبتن لا سمعت صوتها أشعار
تدور رضاك وغيرك أتدور أغضابه
عشيقت فروع المجد ولها الشرف والكار
وتلبس لك المدح بشته وجلبابه
لها الصدق ثوب أبيض ما عليه أزرار
ومن حقها تفخر بلبسه وتزهابه
تطوف أبخيال ما تريح عن الأفكار
الى ناموا السالين فالليل يسرابه
من أنتاج فكر ما بقى من وراه أسرار
يكون الوفى والصدق والفين رحابه
يرحب أبحر غيبته وحشتن لدار
عسالله يونس وحشت الدار بايابه
كبار المصايب في عيونه تصير أصغار
ملاذ الدريك ان عضه الوقت بنيابه
كرمه الذي حط المصايب عليه أتغار
وحسده الزمان وصار يكثر تقلابه
تحمل على نفسه بعزم وقو الإصرار
عسى الله يرده سالم ويسعد أصحابه
بحق الرسول المصطفى والصحب الأبرار
بدعوة إنسان زار بيتك وصلابه
دعا لك لحيث لك حقوق عليه كبار
ومن يفعل النوماس ملزوم يجزابه
صديق صدوق ولك معزه ولك مقدار
وراع الوفى دايم وفاه يتعلابه
وروس المعالي دايم مسكن الأحرار
تخلي الطمان وعالي المجد ترقابه
وأنا خابرك حر يفاخربك الصقار
لا منه أطلقه يدمي من الصيد مخلابه
أقوله وطيبك واضح ما عليه غبار
رجل الوفى والعز قبلي تغنابه
ولكن الرجال رجال والله خلقه أطوار
رجالآ لكن فالطيب ما هيب تتشابه
وأنا عارف أنك يمين والا الرخوم يسار
ودرب الوفى منت أبتخافه ولا تهابه
الا..يا حكيم الشور لا شحت ألآشوار
الا.. يا فخر من حطك ألراسه أعصابه
حكيم، تروض حكمته غادي الأبصار
لبيب وأديب، ومحنك، فاهم،نابه
عديم السجايا وأفي الجود والأشبار
لا منه أعتزاء ما يعطي الحق طلابه
عطيب الظرايب سلت مهند بتار
يفاخر ويرفع هامته من تعزوابه
صديقي وربحي راس مالي مع التجار
أفاخر به اللى فاخر النذل بحسابه
صداقت شرف تبنى على عز وأفتخار
لا صار ان صديقي يرفع الراس بأدابه
من هذا صديقه ما غبط راعي المليار
ولا ينشد الكساب ويش كثر مكسابه
صداقت شريف النفس يبقالها تذكار
ما دامة صحاري نجد في نجد وهضابه
على العز والآخلاص مأساسها بينهار
كلام المصالح ما تسيس وتبنابه
صديقي..قصيدي عند أمدحك يصير أقصار
وعريب المعاني صار مدحك هو أعرابه
تفضل وخذها المترفه تجذب الأنظار
تسوق الخطاوي لطموحات وثابه
نظمت:الذهب واللماس والولو والمحار
على جيدها، ما هوب لجل تحلابه
علشان مال عيارها غيرك أنت عيار
رفيعت مقام عن أهل النقد هيابه
ثقيلة مراز ما تهز هز مع أتيار
ولا أحد،، سواك أتجيه ولا تهقوابه
لكن ان كبار المدح عندك تصير صغار
ما دام سنام المجد تحتل محرابه
أقولها وأنا اللي يجلب العطر للعطار
بسوقك جزيله يزهد بعين جلابه
بغيت أتعذر وانت ما تقنعك لاعذار
والأعذار عند معرب الجد كذابه
تمنيت أزورك..الوفي الكريم أيزار
ولكن ان ظروفي يا بيض الوجه غلابه
لكن أرتجيك العذر جعلك تعود أمجار
من القلب دعوات مسلم جعلها مجابه
عسى الله يجيرك يا ملاذ الخوي والجار
يجيرك كريم فاتح لدعى بابه
يعافيك رب رحمته تسقي الأشجار
بالأمطار بامره من مراويح سحابه
عظيم الجلال اللي حمى المصطفى بالغار
من المشركين قريش ما داسوا أترابه
توكل على الله دام وقتك ملي أخطار
ترى الناس منه يا بيض الوجه مرتابه
وعليه المنايا ما تقدم لاهلها أنذار
ومن بأغتت ماهيب تقدر تجنابه
وفيها المكاسب يا رفيع المقام أصفار
ولا أحد يميز بين سلبه من ايجابه
ولكن تحل الصبر وخذه عليك أيزار
ترى الكيس:اللي فصل أبصبره ثيابه
وختمة القصيد بذكر من حدد الأعمار
هو الخالق اللي خافي أعباده أدرابه
نساله يجير أبواننا من لهيب النار
علينا الدعاء والله جدير بالإجابة