يا شرق فيك جو منور
والفكر ضلام
وفيك حراره يا خسارة
وبرود أجسام
فيك تسعميت مليون زلمه
لكن أغنام
لا بالمسيح عرفوا مقامهم
ولا بالإسلام
هي الشموس بتخلي الروس
كدا هو بدنجان
يا بنت باني الهرم لمي هلاليلك
والبرقع اللي انخرم ويا مناديلك
يكفي لومان في الحرم
في قيد خلاخيلك
ما شفت زيك سجين ساكت ومتاوي
غلبت أقول للرجال خلوا المرة حره
تخش رخره المجال تفهم وتتدرى
العاقلة بنت الحلال ما يضرهاش بره
لكن بتنصح ف مين روس جامده صنطاوي
جهل النسا بالعلوم خلانا انتيكه
نفهم في فن الهدوم رقعه وتشتيكه
وفي البلد عالعموم
ما تلقى فابريكه
غير فابريكات الطحين
فليحيا بدراوي
راية ولاد العرب في الأرض منكوسه
طول عمرها والسبب إحسان ونفوسه
والله اللي قال ما كدب نسوانا موكوسه
حتى اللي متعلمين بردون يا شعراوي
عجلي ملخبط يا خلايج وعنيه مزغللين
من نسوانك يا فرنسا البيض العريانين
يا صلاة الزين يا ما شا الله يا ولاد عالنساوين
على شط السين يا محمد نايمين وممدين
واحده عاتعوم في الميه والتانية في الكابين
لابسين خلجات للركبه دايبين ومجطعين
واللحم زبده طريه كاسياه الفساتين
مطرح ما دوس واطبش ملجاشي إلا عجين
ونا هاتعجب يا خوانا يخرب عجلي التخين
اشمعني جفاهم أبيض وجفايا زي الطين
ونا ناشف ليه ومعضم ودولاته متختخين
والله صغير يا محمد حبسوك سبع سنين
وامك عاتجول يا محمد وأختك يا محمدين
وجرايب جرعت باشا لابسين النياشين
تلقاهم في الجزيرة قاعدين ومفرشين
للبيه منهم تكريعه يسمعها اللي ف شبين
صدج من قال بلادنا دي بلاد المنفوخين
بالبنطلون والسترة عاملين متمدنين
ليل ونهار يا حبايب مساطيل ومنزلين
ما يشوفوا الطور من النعجة والفرخة م الهاجين
ابكي عليك يا معوض مسكين والله مسكين
وحديك قاعد وحبايبك في البلدان مزعوطين
زغلول باشا المجاهد في بلاد العيانين
والسلطة العسكرية قطعت ايدي اليمين
واللورد له أوامر مكتوبه عالجبين
لا البرلمان يمسحها ولا حتى الشياطين
ما عمري يوم للمنجم رحت استفتيه
اللي مضى اعرفه، واللي حضر، أنا فيه
ومن كرم ربنا، مستقبلي خافيه
لو كنا نعرف نهاية امرنا يا قوم
كام يوم نشوف السعادة والشقا كام يوم
لا يطيب لنا عيش ولا تهنا العيون بالنوم
الشر والخير، بلا منجم، حا نستوفيه
ومين يا عم المنجم؟ مفتري نصاب
الناس رآهم حيارى فاشتغل كذاب
والكذب أبواب ونعرف كلنا الأبواب..
ان قال لي عندك قضيه، كلنا مشاكلين
وان قال لي تسافر قريبًا، كلنا مسافرين
من دنيا رايحين لآخره، والمخلد مين
لعن المنجم؟ ولو يصدق؟ كل كتاب
ومين يروح للمنجم؟ الهمج لا غير
الست دولت، وغانم والدسوقي بدير
وعبده افندي وزينهم، واسماعين وخضير
لا عقل فيهم ولا ملة، ولا إيمان
ولا حفظ بعضهم آيه من القرآن
جعلوا المنجم اله، لك حكمه يا رحمن
جعلت قرش المنجم قرش كل سفيه
ما عمري يوم للمنجم رحت استفتيه
أيام ما كان الحريم خلف الستارة مصون
كان أي واحد جهول يفتح خطيب مأذون
يجوزك بالمقاولة.. ولا بالعربون
وانت بختك يا تسعد تلاقيها دون
استفتح الشيخ في أول ما اشتغل بطلاق
حرمه أميرة.. وجوزها سئ الأخلاق
والقاضي يحكم في شرع المسلمين بفراق
على المره المجرمة، والراجل المجنون
الست من ناس زمان، صاحبة أدب وكمال
م الحشمة دل الي لا خاتم ولا خلخال
والليما عطاها صيغه، ما عطاها جمال
يكفي التقى والصلاح والملح والكمون
مأذوننا كان واد عبيط عمره ما شافش حريم
من يوم ما أزهر؟ لغاية ما انتهى التعليم
شاف وحده ساده.. بلا لبه وبلا مباريم
قال ما شاء الله... واللي كان ما شاء يكون
يا ست كان حق جوزك دا يبوس رجلك
لكنه فاسق لا يصلح لك؟ ولا يليق بك
لازم اوف لك أنا راجل أمير مثلك
م اللي يحافظ على عرض النساء ويصون
قالت انا واحده، لا بودره، ولا احمر
عايزا لي راجل لا يتمرقع ولا يسكر
يعرف مقامي ولا يخبص ولا يسهر
وانشا الله آكل معاه ملح وبصل وزتون
بقت تروح للخطيب، في كل يوم نوبتين
لحد ما شاف لها راجل قعد لها شهرين
مراته ماتت وفايته م العيال اتنين
عايز لهم واحده لو خان الزمان ما تخون
مأذوننا قال له.. انا عارف مره حره
عيني ما شافت أميرة ملها مره
وبيتها مليان موبيليا من بلاد بره
رأيتها لما انتهت م الراجل المجنون
فيها البساط وحده يفرش الجامع
ودولاب عجيب لو تشوفه تلتقيه لامع
ولما كان بعلها في غشها طامع
رهن كراسيها عند القهوجي انطون
أبو العيال بات ليلتها عالمدام قاعد
والمهر خمسين جنيه فوري راح ناقد
وبعدها بجمعه كان فراشها راقد
شاف لك دي حته مره انشف من العرجون
البين نحل جسمها والهم كاويها
والفقر راخر متمم شغلته فيها
والموت هجم ع الحبايب من حواليها
خلا القرايب والحبيب تحت التراب مدفون
في ليلة الدخله لابسه القميص ساتانيه
وتب طويل فوقه والبالطو القطيفة عليه
اسود طويل للقدم.. تفصيل كمال واديه
بكرك ابيض عريض والصدر بالكبون
أما الموبيليا اللي كان طاير بيها الأستاذ
صندوق بسبعين وستاشر صفيحه جاز
فارغين وفوقهم قبايبها تلات اجواز
واربع مغارف خشب ابيض وست صحون
صبح يشوف الخطيب واقف بيستنظر
طالب حلاوته خروف يتحط في انجر
ضحك وقال له نهارك يا عريس ازهر
قال له نهارك زفت متقطرن يا شيخ ينسون
قال اما انك صحيح.. مسروع وغاتوتي
مالكش صنعه الا يا مأذون يا حانوتي
سعيت لي في الخطبه وبتسعى على موتي
والأجر في الشغلتين يا شيخ على مضمون