يارب الدرب طال وْهالمسافة موغلة آلام
يارب الحظ مال وْلا رجا ينفع في تعديله
تعِبنا وْكل ماقلنا تهون وْهالوعد قدّام..
تموت عْزومنا وأدنى طموحٍ منهدم حَيله
تعبنا والأماني طيف ساري يشبه الأوهام
ياواقع ما قدرنا نفهمه .. نقرأ تفاصيله
نكابر، كم نكابر .. ماحسبنا لْدورة الأيام
تجرّعنا مرارك ياالصبر، من ضيقة الحِيله
هي الأحلام ضاقت او تعِبنا نرسم الأحلام؟
أو إنه كل حلمٍ صار لغزٍ، ضاق تأويله
كذا البسمات باهت لونها تلبس شِفاه أيتام
ملامحنا دموع، وْكل حزن اغرق مناديله
هي الدنيا هدتنا الذل.. لو حنّا ولِدنا كْرام
كذا من صغرنا، ونْشيل همّ كْبار ما تْشيله