وشصار يعني لو حبيبي هجرني
ما همني لاهو ولا اللي يقولون
كم واحد قبله وفيت وغدرني
ما قامت الدنيا ولا صرت مجنون
وان كان قصدك بالخسارة خسرني
وان كان قصدك بالعطايا يولون
محد على ذيك العطايا جبرني
وشرواي لامنهم عطو ما يمنون
شي خذيته من ابوي وشهرني
الطيب اللي حي لو كان مدفون
وبالشده اذكر بالرخا من ذكرني
واجيه أنا من أقصاي لا صار مغبون
واتعب على منهو جرحته وعذرني
وامسك عليه الى اخطا كلمة اتمون
واسهر عشان اللي تعبت وسهرني
وكانه سهرني بعين ابسهر له عيون
واشكر كرم منهو عطيته وشكرني
والله يسامح من خذا وقال مديون
رح للذي تو ما عرفني وخبرني
وقله ترا نصار كلمني هاللون
كل الجفا اللي منهم ما عسرني
صاروا معي وإلا علي ما يهمون
لي الشرف غير الزمن ما كسرني
أطيح وأضحك له وأنا كلي اطعون
حتى لو طيبي لعبي ودمرني
أموت لي منه ولا أموت ممنون
وصحيح أنا طيب وعقلي كبرني
لكن إذا ضاقت علي صرت مجنون