لا وقعِ لا صوت لا تأثير لا رفه
هذا انطباعي والألم حيل يحويني
والشوق ينضح والتجاويف ملتفه
تخنق بقايا طيف ملفاه في عيني
اوزن حروفي والأمل يِثقل الكفه
واخفي دموعي عنه والفرح ماليني
واكتم جموحي والثقل واجب العفه
مهما نهل مني الأضعافيعطيني
حتى على الزلات وياه في صفه
مقدر اعارض مصدرٍ حيل يرويني
ما مرني إحساس يقوى على نزفه
لو يجرح ايامي والآمال وسنيني
معه أول احلامي والأشواق والرجفه
واول بشاير تسكب العشق ما بيني
امنت عمري معه واعطيته الدفه
وكل حالي عسى قربه يخليني
ظني وفيت وسرت بالملي ع الوصفه
والناتج اخطيت لاشي يعفيني
والحين مدري يا ترى تنفع الوقفه؟؟
والجرح بادي والجناية بسكيني
حتى القدر كفه يربت على كفه!!
من زود حزنه صار يصرخ ويبكيني
سلم كياني عنه في ليلة الزفه
وانا عروس الموت والنور يغشيني
حتى جمود الكون من مقربه ادفه
اقلها لا انكشف نزفي يغطيني
في ليله القارس يصحى وانا اغفه
ياخذ على نفسه وانا يبديني