سمعت لي كلمةٍ مدري وش أقصاها
حزت بصدري وانا مانيب هارجها
لو كل كلمة اليا جتنا طردناها
بعنا الثمينه بسعر مايخارجها
ومن يم هذا لهذا مانقلناها
والناس واجد وتلقى من يروجها
من جابها بين خلق الله ووداها
لو به مراجل ترا نفسه يسمجها
من عامل الناس في سابق خطاياها
يقعد بدارٍ خلا ماداج دايجها
في كنةٍ تشوي الجربوع رمضاها
تيبس غصون الشجر من حر واهجها
والناس بالحق حكم الشيخ مارضاها
ماترضى الناس لوأنك تحججها
ياللي تبي الطيبه خذها وعطناها
وخل الطريفه طريه لاتثلجها
وأقضب طريق الاوادم وامش ممشاها
واتبع دروب العرب وادرج مدارجها
وارسم لنفسك حدودٍ لاتعداها
من حط نفسه بدرب الضيق يحرجها
وان كان نفسك هواها قام ينحاها
حط الاعنه بروس الخيل واسرجها
وفكر بمنكافها قدام مغزاها
واضرب حساباتها وتشوف ناتجها
وكل بعضده يموح الدلو برشاها
وتلقى كبود الضوامي من يبهجها
وان صدت الناس عنا ماعترضناها
ماتقفي الناس عنا ونتولجها
وان جاتنا الطيبه بالطيب زدناها
الطيبه بالعسل والسمن نمزجها
وان جاتنا الثانيه نصبر ونرفاها
يمكن اليا فاق راعيها يعالجها
وان عادها عودتن ماعاد ينساها
من حربتن في صميم الصدر نولجها
مسمومتن يبلش الدكتور بدواها
مايقنع الخبل لين انه يلامجها