حب بدون شروط مسبقة
كلمات: معاذ زكريا خالد
ذات النفس الطالع منك ؛ مارق مني
ونفس الوجع الساكن قلبك ؛ عايش فيني
وكل غناوي الريد غنيتها ؛ وياتو كلام فيكِ يكفيني
و آه لو قدر بريدك ؛ كان ريدتيني
وانا لسه حديثك بشجيني
ولسه عيونك بتخليني
أسرح في ملكوت تاني
وتاني ح أقولها
أيوا بحبك زي أول
ويمكن أكتر
وفوق ما تتصوري
لسه بحبك
ولسه غرامك
لو مات الشوق جوايّ
قادر يحييهو ويحييني
وأنا لو بأيديّا
أديك عينيّا
وضي عينيّا
وباقي العمر الفضل كلو ( لو كان يرضيك )
بس هل فكرتي في يوم إنك ترضيني؟؟
عموماً ما شرط يا غالية تجاوبيني
أصلي وحاتك هذا الموضوع ما بعنيني
أنا عايز أهواك ( دون أي شروط ) حتى إن كنتي (سعادتك) ما بتهويني
زي ما الزهرة الحائرة
بتحب الشمس النايرة
من غير ما تسال:-
( يا شمس ؛ هل إنتي كمان بتحبيني؟؟ )