من اول فطآم الغلا.. للمنآيآ
مااذكر على بآبٍ يجآفيك طقيت
وتشرّعت من جور فعلك زوآيآ
وعرفت ليه اني من العآم مَ اخطيت
قد كنت لك شآيب.. يسوق الوصآيآ
وقد كنت لك طفلٍ.. بيدّك تربيت
ودآيم ازفّك من وَلَه للحنآيآ
احسبْك من بِيض النوآيآ تحنيت
لآ مآدريت انك كثير النوآيآ
ويآليتني ادري عسآني تدآريت
تحت الغبآ.. يآني مسوي سوآيآ
وفوق العقل.. ماادري انا ويش سويت
لاجلك اكذّب بالوجيه المرآيآ
وانته سقيت الحي من نزعة الميت
طعنت إخلآصي بخنجر عمآيآ
وادمت خطآوي مآ لفا طيبهآ بيت
شفت القبر قلت اشهد انه دوآيآ
لكن تكفّنت بشقآيه وعآنيت
مآعآد صبح الليل ينثر مزآيآ
من يوم ليل الصبح شرّف وقفيت
ماادري قتلت اللي بقى من خلآيآ
والا انبتت لك بالخلآيآ عفآريت
من جيتلك كآنت يديني ضمآيآ
واليوم رآوي من عطش مثل مآجيت
طلبت.. تسمع من عيوني غلآيآ
وقريت لك قلبي بعزفه.. وغنيت
قلت: السحآبه ضمّتك في سمآيآ
وآخر حكآويهآ معك.. يوم هلّيت
لكنّ قيعآنك سوآت العرآيآ
حتى ولو اعشبت مآيوم مديت
كآنك ترد مْن الهدآيآ هدآيآ
يآمآ على دمعي من الظلم مشّيت
صحيح قلبك غير كل الصبآيآ
لكن انا دآخل حيآتك تصآبيت
واسقيتك الدنيآ بكآسة وفآيآ
وعلى انتظآرك بالمشآعر تشآويت
ومآني بعآيد لك كبير الحكآيآ
بس استمع دآم بعيوني تحآكيت
مَ المشكله انك كثير الخطآيآ
المشكله اني اذا اقفيت.. اقفيت