تهيض القريحة من بعد طولة المرقاد
وهي والله انها تعشق اللي يهيضها
تجيني بثوبٍ مخمليٍ مهو بمعتاد
لعين المهاة اللي عسى الله يحفظها
مهاةٍ يجملها حلاة وحيا وعناد
ومن زينها حبيت حتى تناقضها
ثقيلة يلوق لها التغطرس وبنت اجواد
بها غطرسة محدٍ من الخلق يبغضها
سليلة شيوخٍ مجدهم يتعب القصاد
ولا يكفي القاموس لا جيت ابى اعرضها
تغلى علي احيان في ظلم واستبداد
ولكني استمتع برقة ملافظها
لها الود والتقدير في خافقي يزداد
لها قيمةٍ ما فيه شيٍ يعوضها