بتتذكري بالمدرسي شو صار ؟
وقت الي كنّا ولاد نتفة زغار
وكنتي بعد انعم من النسمات
ال بتروح تتمشى على الشيّار
شو كنت حبّك شو نمت ليلات
غيران من شبّاكنا الختيار
الي كان انتي يشوفك وبالذات
ما يحسّ كيف ملبّك وعم غار
وتا صير قرّب منّك بنظرات
احكيلك بنهدات جمر ونار
كنت فلفش دفترك مرّات
بحجّة أنا مش دارس ومحتار
وكان قصدي اكشف الورقات
خطّك مساكب روح للأزهار
وضيّع عمد زوّادتي أوقات
عن قصد منك آكل الأسرار
ولو تلمسي طبشورة اللوحات
امشي ورا منك تا لمّ غبار ..
وياما على الحيط وعلى الطبقات
حافر محبة بإبرة البيكار
بعدني بكزدر على الطرقات
وبشوف ماضينا عطر وزرار
مبارح تلاقو عيونا ولمحات
عم تختصر تاريخنا ومشوار
وتأكدت من دون خود وهات
ما زال نظرة ردّت الماضي
لا تعاندي نحنا ما صرنا كبار