شوفي مثل ماني على حطة يديك
واقري وش آخر ما كتبته لغيرك
مبطي وأنا ميت ضمى دوم وأرجيك
وبردة عظامي بالغلا تستخيرك
يوم القسى وينه غرامك لغاليك
وينه ضميرك بس وينه ضميرك
رحتي وكن الموت يمشي برجليك
وكن الشفق يشرب ظلامه هجيرك
ما شفتي اللي يوم رحتي يباريك
وده يضم خطاك / وده يثيرك
وانتي تقل شي على البعد حاديك
ماكنه إلا مزهب في جفيرك
واليوم جيتيني وأنا آقول ما بيك
قبلي قليلي ما استحى من كثيرك
مات الأمل فيني وخاب الرجا فيك
الله يبيح القلب والله يجيرك
ماودي انشد دمعتي ليه تغليك
ولا ودي اعرف وش نهاية مصيرك
روحي وضمي دمعتي بين آياديك
غيرك كتبته وانشطب لجل غيرك