من معقل الصمت ثارت مفردات البيان
اللي لقت بك دلايلها وبرهانها
يا ثورة الحسن يامبحث علوم الحسان
ممالك الغيد عندك تعلن إذعانها
لبيه ياعيونك اللي قبلها الكل كان
سلطان عرش الجمال (وذاب بأجفانها )
قلايد المدح لو تجمع طوال الزمان
تموت ما بين وجناتك وريضانها
كينونتك وجهة التايه وبر الأمان
تدفى المشاعر على انفاسك وتحنانها
مشاعر الروح لو تقمع بوجهي تبان
وشلون تخفى لآمرها وسجّانها
احساس روحي تصوغه لك حروف اللسان
وان غاب حرف الشعور تصوغه اعيانها
أنتي صخب فكري الطاغي وصمت المكان
يا غطرسة طيش ذاتي يا ذوابانها
عسى مناسك هواي تزفني للجنان
اللي تدلى ثمرها واثقل اغصانها