انا واد خلاصه وواد مشهور
وفي الرئاسه ياناس معذور
بابوس أيادي.. واشتمها عادي
وجدي باني هرم دهشور
بحبك وصدعتي قلبي اللي داخ
بحبك وقلبي أهو نازل صراخ
حبيبي ياباشا ياعيون عكاشه
باازغط في بطك واوكل فراخ
بحبك ونفسي..أكونلك عريس
ولجلن عيونك راح أبقى الرئيس
واعيد النظر... في سعر البقر
في سوق التلات وسوق الخميس
حبيبتي جوابك.. لقلبي وصل
يانحلة حياتي. وعمري العسل
هازرع جنينه... تضلل علينا
جرجير ولفت.. وحزمة بصل
ياناس جمالي دا رباني
وخالي هو دا رباني
وجدي كنت تشوفه تقول
فرنسي دا ولا ألماني
أنا اللي معروف عنواني
في العباسيه هاتلقاني
على كرسي قاعد ومتبت
عليه بايديا وبسناني