يمته جای
حرگو اعيون الصرايف وی امس
وثلّجوا عمر الفراشه ابنص شمس
وباگو الفانوس من زفت العرس
يمته جای
ماتت الضحكه ابنزلنه و اتركوهه ابلا دفن
والفرح شد عالرحيل
والجسم صبح نحيل
وعوّدونه انعيش باحلام وحزن
يمته جای
كسّروا فیّ السنابل
و وشّروهن بالحقد كل المناجل
سدّوا ابواب الحديقه وامروا
العصفور لازم ينحبس
وشنقوا الفلاح بحچاية همس
وشتلوا الخرنوب بعيون الورد
و الورد مذبوح بچفوف البرد
والربيع اختنگ ماجر النفس
و چتّفوا جنح الحمام وماله حس
وگام ثعلب يلعب ابهيئة اسد
والافاعی تلدغ ابلب الجرح
الناس عطشوا شربوهم صم ملح
ورسموا ابوجه الفرح صورة عبس
وباعوا الوجدان بشويت فلس
يمته جای
يبّسو لهجة گصبنه
وخنّگوا سمچة نهرنه
وغرّگو قارب املنه
وكتبوا ابراس النهر لازم تهاجر
و ترسوا اضلوع النهر ليل و خناجر
و حرگو اغصون الغوارس
و كحلو بجسادنه اعيون الدوارس
خرسوا صوت المدارس
واندفن بيهه الامان
گطعوا اصوات الاذان
خدّرونه وآمر الجلاد لازم ننذبح
وماتت الغيره ابسلفنه ابلايه حس
وانگطع شم الهوه ابضيج النفس
يمته جای
رمدت اعيون المدينه
تعبت اچفوف الحزينه
و ضاگت الدنيه علينه
رد يغايب
زادت علينه المصايب
ولون ما تحضر تنجيهه
الحقايق تندرس
ليش صابر
ليش صابر وانته شايف
چم غزاله التنفرس بنياب ذيب
وشگد هلاهل ردت بصوت النحيب
وچم بحر من دمنه لازم ينترس
والحزن ظل بالگلب يرفس رفس
وينك انته ماتجينه؟
انه اجيك
انه اجيك وشايل ابروحی طفل حاضن لعبته ،و راسه يلعب عالرصيف
انه اجيك
انه اجيك و شايل ابروحی ام شهيد، المات ابنهه و هلهلوا شماتهه اگبال النزيف
انه اجيك وشايل ابروحی ارض حبلت ذهب،، جابت ذهب،، بس عيّشت اولادهه ابثلمة رغيف
انه اجيك وشايل ابروحی منابر تلطم اعله الراس و امغيره اللبس
ثعلب امغير لبس
اليوم امس
عگبه امس
والبرد كاتل شمس
والصبر بينه علس