ياحروفي بلغيني غايتي قبل العسام
لين افك العاني الي في شراييني اسير
جيت ابجمع مابقالي تحت انقاض الحطام
واصطفي من حرفي الي يجبر العظم الكسير
بين تجريد التناقض وإلتفاتات الهيام
وأبتداءات التآلف لين تحديد المصير
وبين دمعات الحزين وكيف معنى الإبتسام
بعض من مال الفقير يصب في كف الأمير
إعوجاج القوس يعني شي من حظ السهام
والدليل الذرب عونه غيث من بخت الضرير
ولشعور الابجديه ذوق أو لذة غرام
حين مايسدل ستار الليل للنزعه سهير
رب زادٍ خير منه إليا تجرعته صيام
ورب صمتٍ خير منه البوح فاليوم العسير
ورب عونٍ منك ينفذ فيه معنى الإعتصام
دامك أنت الواحد الي صدق في نفسك خبير
مالك الاّ (أنت) تصبر نفسك ان ثار القتام
أنت ماغيرك لنفسك يامعاندها نذير
أدري إنك مارهنت الشوق هذا للصدام
وادري انك مارهنته غير للبحر الغزير
أبجديتك العزيزه تلبسك تاج ووسام
مايهمك غير حرف لوافر المعنى سفير
حتى انا مثلك تحديت المواقيف الجسام
تمحل ارياض المشاعر لين ماتصبح قفير
مير اسلي خاطري لاهب لاهوب السمام
لاغدى للريح داخل جوفي الخاوي صفير
أنعش افكاري ولا اغادر مواثيق الذمام
ياعساي ابات ليلي ساعة العسره قرير
صعب اصور كيف حالي بالوفا لك والتمام
لأن بعض البوح يشبه مضرب السيف الشطير
لوركضت الليل كله لين يبتل الحزام
ماوصلت لغايتينك يامطوعة الحذير
التفكر طير طاير في سما معناك حام
مدركٍ للهمس يفرق ضجة الصوت الجهير
مابقى لي شي اقوله غير يامال السلام
ياحروفٍ علمتني كيف احن وكيف اسير