ألا يا الله ياللي تحت هيبة سلطنتك أسلمت
لك المسلم يسبح لك بحمدك ولك الإسلامي
أحمدك وأشكرك واثني عليك بما علي أنعمت
تزودني وفا قدر العشير ووصل الأرحامي
ولجك الفجر يا ليل الذهول اللي علي اضلمت
يعرضك واقع الماضي بعيني عرض الأفلامي
ولهتك يالنديم اللي على صافي وفاك اضرمت
بصفحة ذكريات العام واللي من ورا العامي
بعد تقرير مشوار التجارب نجحك واجزمت
بان السيف سيفي والعصا والمحزم احزامي
عطتني عزلة إخلاصي معك نسيان من نادمت
كتبتك وانطوت صحفي عليك ورفعت اقلامي
اباهي لا أبالي واتبيسط كل ما قدمت
أشب النار قدام العرب وأشيد أخيامي
نهاري حر شمسه يستحي منها لسان الشمت
وليلي ترقب نجومه ملامة كل من لامي
على ضو الكلام اللي كشف عنا ستار الصمت
عرفت إني تحت برق الأمل في روض الأحلامي
احسب انك تيمم باتجاهي وين ما يممت
واثر ما أنت بورايه في الطريق ولانت قدامي
مصيبه لاتدنت قيمتك في عين من قيمت
يشوفك بالسهل وانته تشوفه بالسما السامي
كثر ما حن قلبي للونيس وكثر ما درهمت
فجر صدري حنيني واتعب الأقدام درهامي
عيون الصد وعيون التجافي حول مهما اكرمت
تشوف المجتهد كسلان والبناي هدامي
مدام ان جانبك شام لجنابي وانت عني شمت
كثر خيرك وأنا ما نيب لا جايع ولا ضامي
أشوف انه علي واجب ليا مريتكم سلمت
مرور إكرام تربطه الكرامة عند الاكرامي
على شان الخفوق اللي على عرشه قعدت وقمت
حجب عنك الدجى لين أشرقت لك بيض الأيامى
ختام السالفة يا طيب العشرة كرمت ودمت
هذا حقك علي وحق شرهاتي على أوهامي
مصير الوقت يشرح لك دروسه وان غفلت ونمت
يصحيك الزمان اللي يصحي كل من نامي
تذكرني لامنها خابت أوهامك فمن وهمت
وشفت الفرق في حب الخشوم وحب الإقدامي