الدور ما هي زرفتين وشبابيك
الدور.. صفحة نور ونجوم وأفلاك
احسها مثل الكفوف المشابيك
مثل البحر والناس... حيتان وأسماك
واخترت أمد حبال صوتي وأناديك
يا الواضح.. المجهول.. يا الغامض.. الشاك
الله يا مسهل ومصعب معانيك
الله ما مرك على القلب وأحلاك
ياما نشزت ودوزنتني أغانيك
ياما زعلت وكان يرضيني ارضاك
قبل المدينة.. مدنتني صحاريك
قبل البداوة.. بدونتني سجاياك
يالشيح عمك يا الخزاما بناخيك
يا الشمس تشرق بين شرقة ثناياك
قلت الغرق واستدركتني موانيك
قلت الضياع وقدت الروح ظلماك
ما لي وطن ياكود داخل منافيك
ما لي سما.. خارج أشمالك ويمناك
سمعي فمي.. سيرتك غابة مساويك
دمعي.. دمي ما بين وصلك وفرقاك
تفداك عين ما ترد النظر فيك
ويفداك قلب ما يشوف العطش ماك
قلبك دليلك كل درب يوديك
الشوق زادك والنوايا مطاياك
صب السحاب وبلُل اشفاه ضاميك
وإن قلت قربك طالبه قولي: جاك
والوزن وزنك والقوافي قوافيك
والا القصايد قاصرة دون معناك