أيد مقهوره .. و أيد تتباس
أيد مشقوقه و شايله الفاس
وأيد بتحب.. عليها الناس
أيد محنيه.. و طاهره يا ناس
وأيد مرفوعه.. بمزه و كاس
أصل الظلم.. يا بلدي أساس
أيد منقوعه.. بنصب و غش
وأيد مزوعه في صحن المش
أيد في الخير.. تكبش و تنول
وأيد ممدوده في طبق الفوول
أيد بتربي.. بقرش حلال
وأيد مشغوله.. بجمع المال
أيد عرقانه.. و خيرها يصيبك
وأيد ممدوده في جيبي و جيبك
أيد بتنضف بلدي.. وتبني
وأيد بتنضف.. خيرك يابني
أيد بتراعي في بلدي ضميرها
وأيد بتلغ.. و تنهب خيرها
أيد تتوضا.. و أيد بتصلي
وأيد بتقش.. يا ناس ماتخلي
أيد بتطبطب.. يابني عليك
وأيد بتلطش.. فيا و فيك
أيد مظلومه.. و أيد كدابه
أيد فقريه.. عيالها غلابه
وأيد بتربي.. صقور و ديابه
أصل بلادك.. صبحت غابه
أبن الغلبان.. يصبح خايب
وأبن الكداب.. قاضي و نايب
أيد محنيه.. و طاهره يا ناس
وأيد مرفوعه.. بمزه و كاس
أصل الظلم.. يا بلدي أساس
تركه.. و ورثوها الأنجاس