بعض القصايد تشبه لبعض الاخوان
اوّسطهم اللي تكتسيه الرجوله
وبعض القصايد مالها بالفكر شان
مثل الهبيل اللي ينقّل طبوله
واللي قصيده ماتعدته الاوزان
الشعر مثله ماوربي ينوله
وان قال هي بالصوت مع جر الالحان!!
اجل عصافير الفضى من فحوله
مليت يا محمد من الليل يادان
وتكريس ضعف الشعر في كل جوله
كن القصايد بس من فم للسان
واعلامنا ماهمّه إلا العموله
هم يحسبون الشاعر يدوّر احضان
مايدرو ان الهم نوّخ ذلوله
باقصا حنايا الضيقه وشب نيران
ودمعات عينه بالكا صفقوله
الهم متنوّع له اشكال وألوان
والمحترف يلعب بدور البطوله
وما اقول انا الفارس ومرسامي حصان
الحكم بِيد الناس.. وكلٍ ميوله
الشعر حسٍ ممتطي قلب إنسان
انسان عن مافيه ما احدٍ يحوله
الشعر مثل النار يسبقه دخان
حتى يبرهن قبل يوصل وصوله
الشعر ثوره صدر من عقل بركان
في جيّته حرف المولّع مهوله
الشعر ياما سلّم الموت فرسان
قد راح ابو الطيب ف بيبتٍ يقوله
وماقد نزفت الحبر ياصاح من شان
اطرد ورى الشهره وادوّر سيوله
لا والذي خلاني ابدع بقيفان
حبّه بقلبي عمّر ألفين دوله
وان كانها جتنا على عزّه وشان
تبقى بذمة للمواقف رجوله