نؤيد سيادتك لفترة جديدة
نكمل خلالها المسيرة السعيدة
وبالمرة فيها نبيع الحديدة
مفيش حاجة تانية نبيعها خلاص
نؤيد سيادتك لأجل المزيد
من اللى تحقق بفضلك أكيد
بقينا خلاص ع الحميد المجيد
وربك لوحده فى ايده الخلاص
نبايع سيادته ولا حد غيره
كفايا علينا نبرطع في خيره
ونوم شعب مصر العظيمة الشخيرة
يقول للحرامي ما تسرق كمان
نبايع سيادته وابنه وحفيده
مفيش زي فكره قديمو وجديدو
خرابك يا مالطة حيحصل بايده
ومين فيكي يعني بيسمع آذان
نبوس أيد سيادتك ورجلك كمان
تخليك معانا يا ريس عشان
وجودك ضرورة فرضها الزمان
ومن غير وجودك حقيقي نضيع
دي مصر بتاعتك واحنا ضيوفك
كفايا علينا يا ريس نشوفك
وعاذرين سيادتك وفاهمين ظروفك
عليك بس تؤمر واحنا نطيع
في جزمة سيادتك كلابك يبوسوا
وفوق الغلابة بجزمهم يدوسوا
وشعبك ليلاتي يا ريس غموسه
مذلة ومهانة وحوجة ومر
وعشان احنا أصلا شعب انتساب
ودايما وأبدا فى حالة غياب
متعملش لينا يا ريس حساب
دي عزبة سيادتك وفيها أنت حر
ودستور ما دستورشى مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا ومعشش وضارب جذوره
وأيه يعني تهري جتتنا البلاوي
يوماتي كوارث، فضايح، رشاوي
كفايا علينا القعاد في القهاوي
بنستنى لما الوريث ييجي دوره