ماعاد فرحي يقاوم شي اببدابه
والحزن ياقوّته لا جا بيبدابي
لا غمّض الهم يفتح حلمي ابوابه
وياسرع ضيقي على تقفيلة ابوابي
الصدق مركب تحطم بِيد رُكابه
كنّ البحر من سواة الناس منصابي
البارحه شفت وجه الصبح يقرابه
بأفكار قلبٍ عليه عيون تقرا بي
يا حلو ليلي ومرسامي واحبابه
لامن طروا لي يهلّ الماضي احبابي
احن وافرح ويفتح دمعي اكتابه
ويوقّع الحزن واشقى به على كتابي
ياعين كم لك على هالخد سكّابه
ياعين كم له شعور الضيق ينسابي
منّك يديني غدت للكل كتّابه
المشكله ماجفاني غير اصحابي
ومن هو يصدق..صباحي بيّن انيابه
ماعاد اميّز مابين اعداي واقرابي
حاولت اقاوم حفيف البُعد واسبابه
وابطا زماني مع المحبوب متصابي
الحب طفلٍ يسيّل طيبه لعابه
دلوع خلقه.. بفيّة جدته رابي
الحب ضيّع شعور اللي بيعنابه
ودليته الدرب والمعتوه غلابي
ارقى بحلمٍ اخبر الخل يرقابه
وخلي بوسط الفؤاد ودوم يرقابي
فيه الوصايف غريبه بس تتشابه
ما اذكر سوى مدة ايدينه لالعابي
لكن خذاه الزمان بصحبة غيابه
شفني رميت الغياب ورحت بغيابي