نامت على كف الغلا نوم عرسان
وعقد المحبه ماله إلا نحرها
زايد حلاها بدّل العقل بجنان
وبدّلت نوم العين عشق لسهرها
وملّكتها مابين صدري من اوطان
حتى شعرت اني اسير لاثرها
وغابت على هون التعاسه والاحزان
وانا على جمر الوله منتظرها
ياليت لي سلطه على دعج الاعيان
ماكان موج البُعد يقرب بحرها
سجيت وسط البال مع عذب الالحان
وكلْ فكره لفرقا الهنوف احتقرها
ومديت كفي اطلب الحظ إحسان
لكن سحاب الوصل شح بمطرها
حالة يباس مهدده قلب إنسان
عقب الحنان وعقب غيمة نظرها
بردان ولكن داخل الصدر نيران
في ليلةٍ قشرا وغايب قمرها
ما اقول انا ياناس ضايق وزعلان
هيّه كذا دنياي وآنا آخبرها
اللي كسبته من ورى ظهر ماكان
هي ضحكه وحظ المقرّد قبرها
خلاص روحوا واتركوا القلب حزنان
وانا بعانق كل ليله صورها