تنشديني من في قلبي؟ من سكن خلف المرايا
تنشديني كم أحبك؟ ما هقيتك تنشديني
والله انِّك في فؤادي.. ساكنه بين الحنايا
ولو يحب القلب غيرك.. غير لا اتله بيميني
ساكنه ف اقصى فؤادي.. ساكنه كل الزوايا
ما خفق قلبي لغيرك.. في الهوى يا نون عيني
انتي يا بلسم جروحي.. انتي يا كل الحكايا
انتي يا سرْ السعادة. انتي يا فرحة سنيني
انتي يا كل الأماني.. انتي يا شمعة مسايا
انتي يا نبضات قلبي.. انتي وردي وياسميني
انتي نور الكون كله.. انتي يا ارضي وسمايا
لو تغيبي لو للحظة.. والله انِّك توحشيني
إجتمع زين العذارى.. فيك يا حلو السجايا
الغلا حزتيه كله.. وما أضنّك ترخصيني
آه من نظرة عيونك.. آه من ورد الشفايا
آه من غمازتينك.. لا ضحكتي تفتنيني
أَدعي الله في صلاتي.. وابتهل له في دعايا
لا تصيبك عين حاسد.. ولا بفقدك يبتليني
والله انِّي جيت صادق.. صافيه كل النوايا
جيت لك ب اشواق قلبي.. كلها لك صدقيني
ما عليّ من العواذل.. ومن تكلم في قفايا
دامك اللي في فؤادي.. وْدامْ قلبك محتويني
تسأليني ما عرفتي؟!! قَدْر حبك في حشايا
إسألي قلبك حياتي.. قبل عنَّه تسأليني