مين دَلَّك، بالهوى، عَ بيتْنا
مُرِّ النَّوى بْكاس العذاب سْقَيْتْنا
وْمارْبِحْنا بْعِشْرِتَك غير الألم
حبَّيْتْنا!! وْيارَيْت ما حبَّيْتنا
فْرِشْنا طَريقَك ورْد يِضْحَك للدّلال
وْقِلْنا جَمالَك ما انْشَغَل متْلُو جمال
وعْمِلْتْنا زَهْرِة غَرامَك والخَيال
ورْمَيْتْنا من بعد ما شمّيْتنا
ألله! شو حمّلتْنا قهْر وْضَنا
انْ كان الغِنى بالوهْم هالْقلب اغْتَنى
ما عاد مَرَق عَ بالْنا طيف الهَنا
من يَوم ما بْضَوّ القمر حاكَيْتْنا
عْلَيْنا انْ كِنِتْ عتْبان لا تِخْفي العَتَب
مِن هالعَداوِة ما بْيِجي غير التّعَبْ
دلَّيْتنا عَ درب حُبَّك .. شو السَّبب
ضيَّعتْنا من بعد ما دلَّيْتنا؟؟
لَيش تِقهر قلب بيرَفْرِف مَعَك؟
شو وَلَّعَك بِغَيرْنا شو وَلَّعَك؟
لَوَّعْتنا .. بُكرا الهوى بيلَوّعَك
بِتْعود تِنْدَمْ قدّ ما عادَيْتْنا