في عينها شفت الحزن شفت الألم شفت الذهول
شفت المآسي كلها تقطر على خدٍ ندي
سافرت أنا في عينها بين الغرابة والفضول
كلْما اْنتهي من رحلتي ارجع معاها وابتدي
وانسج من خيوط الأسى قصة بلا باب وفصول
تحكي معاناة القدر والبخت والحظ الردي
نادتني باسمة واسكتت غطّت على الطرف الخجول
هلت عبايرها مطر كلما يوقف يبتدي
قالت: حبيبي اللي هلك يشبهك في شكلٍ وطول
مقدر أميز بينكم والعذر منّك سيدي
خيّم على الموقف عجب والصمت يسحب له ذيول
وتخالطن في نظرتي امسي ويومي مع غدي
غصيت ولساني ارتبط واحترت مدري وش أقول
هزيت راسي بالنفي وأخفيت عبراتي بيدي
يا بنت وش لي جابني يمّك وأنا طبعي جفول
وأصبحت من كثر الأسى كنّي سجين بمفردي
آسف أنا يا فاتنة ما عاد بيديني حلول
هذا قضا رب البشر يا بنت صبري واصمدي