فتون : واعرف فتون الما وصبح ٍ ندي
لكنّي اسأل عن الأرض الهبا وش تكون ؟
حفنة رمال ٍ تمدّ كفوفها لسعدي
قبر ٍ يضمّ الأغاني لين مايبعثون
مرحى فتون ، وتهيّا للكرز موعدي
واعشوشب المسك : مسك ٍ خضّب الزيزفون
مرحى تهب اغنيه : با لأمنيه تهتدي
وهناك روحي تصيح بجمع : ماتعرفون
هذي فتون : امتداد اقرى مداه وحدي
هذي ملاذ الرذاذ ومستهل الفتون
لو تلمس الدفتر الأصفر : نخيل يغدي
لو تهمس بغربتي : كوني مدينه ، تكون
يكفي لقيت بأغانيها : سبب مولدي
من بعد عمر ٍ نثرته في مهبّ الظنون
للطيش يا نكهة التبغ المرير اوقدي
صوتي وصبّي زفير الحبر : شعر وجنون
وارمي على كرسي الوحده ثياب جهدي
اما افضحيني عرا ولا استريني مجون
فتون تسأل : تحب ؟ اهمس فتون انشدي
صبح البلابل حفيف امسي وخضر الطعون
وتعود تسأل : وانا كنّي همست : اسندي
جذعي على قبلة ٍ عجلى وصدر ٍ حنون
احبها من نهاياتي عجزت ابتدي
فيها وكيف ابتدي طفله تصون وتخون
وانا من اوّل سكبت المستحيل بيدي
واليوم عاجز لا اسيل كحل هالك العيون
" آهين " ، وادري بمقصدها فنا مقصدي
لكنّي احلف " ولو عزّ السواقي يهون "
تمون ، وان تطعن اوراقي بسود المدي
ارضي خطاها ولو تنزع وريدي تمون
لكن أبي باكر ان مرّت رفات جسدي
تهمس بمنهم معاها : حاولوا تخشعون !!
طفله تغنى بها الما كيف انا ما قتدي
بالما ؟ ولو كانوا العشاق ما يقتدون
حين اشرقت بي صباح السبت ذا مشهدي :
وحدي أناظر لخمس اطفال ملّوا شجون
حسيت نفسي ف لحظتها سما ترتدي
ثوب الأغاني وتسأل : ليه ماتلعبون
شلون لو جت فتون بطيشها تهتدي
وش يعزف المحتفي وش ينزف من اللحون
صبح ٍ تنثّر على الممسا ضيا سرمدي
طير ٍ يبعثر جناحينه لسبع الغصون
الكون كله إلى جتني يصير اجودي
ياما صفني بدربي وانتحى في سكون