خلاص مالي يالغضي حاجةٍ فيك
ودعتك الله والليالي طويله
بكره تدور ايام عمرك وتبكيك
وكلن ب هالدنيا يواجه حصيله
كم لي وانا أداريك تعبت اداريك
كله على شان العيون الكحيله
كنت اعشقك وابيك وارضاك واغليك
وازعِل على شانك قبيله قبيله
واليوم أشوفك زايدٍ في تغليك
تغيب وليا جيت نفسك ثقيله
خلك كذا لين الليالي تصحيك
وكلن على ماقيل عقله دليله
خل الذي خذاك مني ينسيك
وخله خليل لك وخلك خليله
والله من صدوف الليالي يعافيك
وانا كسبت الطيبه والجميله
حتى لونك رحت ماني اباكيك
لو ان نفسي من فراقاك عليله
لاتحسبني لعبةٍ بين اياديك
ولاتحسبن النفس لجلك ذليله
ان رحت جعل الله يوفق مساعيك
وان جيت لي قلبي يزيد تهليله