أنا رايح أتطهّر من الذنب اللي عارفه
وهتوضى
هصلّي.
الحمد ليك
والشكر
كرمك وصل لي.
هبكي على السجادة وسط صلاتي، ممكن أنام عليها
همشي وهتأمل في خلقك رسْمَك
يا خالقي
حسيت جمالك لما بانطق اسمك.
أنا آه باعاني من اكتئاب
ضلمة
بس انت نوري
قلت للوردة في صدري ما تموتيش
ومنعت شتل الأرض: لا تبوري
يا كلمتي
ثوري
لله وليس لأي حد
عديت صوابعي بالعُقَل
بانده مدد.
بامشي على إسفنجة مش فوق التراب
وكإن بركة حالّة في رجليا
عقلي مابيبطلش إنتاج للمصانع
والحبر من كتر الكتابة حَب إيديا.
مش عايز ابقى غير مع نفسي ومعاك
سبحانك اترجّيت ودُك الشعر دَك
لما رأيت النور في دمي سَلَك
لا أسأل البشر الضعيفة
أسألك.
باصص لزُرقة السما الواسعة
ف وصلت للسابعة
اتحرقت
صفيت
أنا رايح اغسل نفسي بالماء البَرَد
واكتب قصيدة جديدة ابدأها باتوضّيت.