يالله يا المعبود وال التدابير
يا عالمً كل الخوافي والأسرار
تجعل لنا من باب نصرك تباشير
ترسل لنا من فيض غيثك بمدرار
باسمك بديت القاف هجس التعابير
من ضامرن قامت توميه الأشعار
هذي وصايا جبتها بالتفاسير
فيها العقول النيرة غصب تحتار
يا محمد اسمعها بوزنً وتبصير
خلك على الهقوه ولو صار ما صار
قبلك بهالدنيا طويت المشاوير
وشفت العجايب والمحن شفت الأقدار
قامت تقلبني كما سالم الزير
في مهمهيات الموارد والاصدار
اعرف ترا الدنيا حلاها النواوير
لا صارت الخدان نوارها سار
ويقفي بها صيفن لواهيبه تغير
ويبقي هميد العشب للعث والفار
لا صار ما يمناك تغرف من البير
اعرف ترا شربك من الناس قتار
واعرف ترا الدنيا سرار ومجاهير
ومن باح سده انفضح سر وجهار
أولى الوصايا لك ياذيب المعاشير
خمس الفروض افطن ترا الوقت غدار
حافظ عليها يسر ولا معاسير
تنجيك بالآخرة تفكك من النار
وباقي الفروض احرص عليها بتدبير
بالك تخلي ركن منهن وتحتار
الثانية تقوى الولي به مياسير
خلك تقي حصن لنفسك عن العار
والثالثة أولاد عمك مناعير
هم عزوتك لادار بالوقت دوار
والرابعة جارك تخصه بتعبير
واحرص عليه اعرف ترا الجار لو جار
والخامسة ضيفك معزه وتقدير
اخفض له النفس القوية بمقدار
بيتك فعله لانصوك الخطاطير
السادسة بالنايفه منزل الدار
والسابعة نفسك هواها معاثير
لا تتبعه حذرا هوى النفس غدار
والثامنة جيبك يعزك عن الغير
لا صار لك مالك ترا ما أنت محتار
والتاسعة فالعذر ماهو بتبرير
وقت الملازم لا تكثر بالاعذار
والعاشرة لا تبدي الشور وتشير
إلا على رجل عنى فابد الاشوار
وبنت الردي لا تاخذه به معايير
حصن نسبك ابعد عن العيب والعار
ثاني عشرها خذ صديقك فنانير
لا لا تصاحب عاق شف لك ولد بار
ترا الصداقة تجلب الشر والخير
اختر صديقك واترك الناس الأشرار
صلاة ربي عد ما سار ويطير
واعداد هب النود وعداد الأشجار
على النبي اللي يسوق التباشير
واعداد ماهلت هماليل الأمطار